Dhá cheacht phearsanta as cogadh síoraí athsheilbh teanga. Chuir Foras na Gaeilge preasráiteas Gaeilge chun an cholúin seo faoi thionscnamh nua ríomhaireachta a bhí idir lámha acu le Microsoft.
Scríobhadh: "I gcomhpháirt le Foras na Gaeilge, Ollscoil Uladh, Ollscoil Mhaigh Nuad, agus Ollscoil Luimnigh, tá Microsoft ag féachaint le leagan Gaeilge de Word XP agus Office 2003 a tháirgeadh. Beidh na leaganacha Gaeilge le fáil saor in aisce ach Paca Comhéadain Teanga (LIP) a íoslódáil ón Idirlíon. Beidh an LIP (nó Paca Comhéadain Teanga) Gaeilge ar fáil taobh istigh de bhliain..."
Tá a fhios agat go bhfuil tú san fhaopach nuair, ní hé amháin, nach n-aithíonn tú na hainmfhocail, ach nach dtuigeann tú cén chiall atá leis na briathra agus ní féidir leat, idir ainmfhocail agus bhriathra, a aimsiú in Ó Dónaill.
Agus ó bhí tuairisc bheag ar an ábhar le scríobh i mBéarla don leathanach teicneolaíochta, bhí ar bhur gcolúnaí scairt a chur ar urlabhraí Fhoras na Gaeilge, ceann faoi air, agus, a iarraidh, há, ní chreidfidh tú seo, ach, mura miste leat, ém, mura gcuirfeadh sé trioblóid ar dhuine ar bith, fan go gcluine tú seo, ar mhiste leat an preasráiteas sin a chur ar fáil sa teanga oifigiúil eile, tá a fhios agat, an ceann a bhfuil stádas oifigiúil aige san Aontas Eorpach - Béarla buí na Banríona?
An dara ceacht - mar is eol do léitheoirí an cholúin seo, tá iarrachtaí leanúnacha ar siúl agam agus ag mo chéile mná na páistí a thógáil le Gaeilge - cé gur beo dúinn i gceantar ar éag an teanga ann tá 200 bliain ó shin, nach bhfuil Gaeilge ag duine ar bith i ngréasán mór na clainne agus nach bhfuil teacht againn ar ghaelscoil nó ar sheirbhísí teanga.
Labhrann muidne, tuismitheoirí, Gaeilge leo i ndúil is go mbeidh toradh inteacht ar an chaint. Tuigeann siad triúr gach rud a deirtear leo nó a fhiafraítear díobh nó a ordaítear dóibh ach freagraíonn i mBéarla; diomaite den chorrfhocal glórach a thiteann anuas ó neamh mar a bheadh aingeal ar cuairt ann. Tháinig cailín de na páistí chugam an tseachtain seo agus dúirt: "Daddy, I know how to spell "cow": b.o."